Rostov-na-Donudaki Cenübiy bölgeniñ arbiy mahkemesi qırımtatar faali, "Qırım musulmanları davası"nıñ mabüsi Ernest Seytosmanovnıñ tevqif müddetini üç ayğa uzattırdı. Bunı "Qırım birdemligi" cemaat birleşmesi haber etti.
Seytosmanov 2023 senesi aperelniñ 4-nece tevqifli qalacaq. Bunıñ aqqında dekabrniñ 13-nde diñlevler vaqtında belli oldı.
Rusiye prokurorı Sergey Aydinovnıñ sözlerine köre, qabaatlav tarafı dava boyunca isbatlarnı berkmekni tamamlağan.
Ernest Seytosmanovnıñ davası boyunca nevbetteki mahkeme oturışı 2023 senesi yanvarniñ 11-nde olacaq. Oturışta mudafaa tarafı öz isbatlarını berecek.
"Qırım birdemligi" cemaat birleşmesinde qayd etkenleri kibi, tutulgan Ansar Osmanov, Ernest Seytosmanov ve Marlen Mustafayev "Qırım musulmanları davaları"nıñ mahkeme oturışlarına qatnağan faallerdir.
Rusiye Federal telükesizlik hızmeti, feralniñ 9-nda Qırımda keçirilgen tintüvlerden soñ tutulğan dört qırımtatarnıñ "Hizb ut-Tahrir" areketi ile alâqası olğanını ve "anayasağa qarşı faaliyet" etkenini bidirdi.
Qırım MC ve Aqyar şeeri prokuraturası Rusiye quvetçileriniñ qırımtatarlarnıñ evlerinde keçirgen tintüvlerden soñ Ukrayina Ceza qanunnamesiniñ 162-nci maddesiniñ 2-nci qısmına binaen cinayet davasını açtı.
Noyabrniñ 30-nda Rusiyeniñ Rostov-na-Donudaki mahkemesi qarasuvbazarlı qırımtatar faali, "Qırım musulmanları davası"nıñ mabüsi Marlem Mustafayevni 17 yıl apis cezasına mahküm etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
