Yanvarniñ 12-nde Rostov-na-Donudaki (Rusiye) Cenübiy bölgeniñ arbiy mahkemesinde "Qırım musulmanları davası"nıñ mabüsi, imam Raif Fevziyevge üküm çıqarıldı. Bunı "Qırım birdemligi" cemaat birleşmesi haber etti.
Rusiye mahkemesi Fevziyevni Rusiye Ceza kodeksiniñ 30-ncı maddesiniñ 1 qısmına ve 278 maddesine (Akimiyetni quvet yolunen elge keçirüvge azırlanuv ), 205.5 maddesiniñ 1-inci qısmına istinaden (Terror teşkilâtınıñ faaliyetini teşkil etüv) qabaatlı tanıdı.
Berilgen malümatqa köre, Raif Fevziyev 17 yıl sert apis cezasına mahküm etilgen. İlk 3 yılını apishanede keçirmeli, müddet bitken soñ daa 1,5 yıl azatlığı sıñırlı olacaq. Bundan ğayrı, azat etilgen soñ oña Qırım territoriyasını terk etmege, içtimaiy tedbirler teşkil etmege ve olarda iştirak etmege, RF FSİN izni olmadan yaşayış yerini deñiştirmege, aqşam saat 10-dan saba saat 6-ğace evden çıqmağa yasaq olacaq.
Raif Fevziyev özü oña qarşı kösterilgen qabaatlavrnı red ete ve cinayet davanıñ Rusiye quvetçileri tarafından uydurılğanını bildire.
"Qabaatlav hulâsasından añlaşılğanına köre, 2016 senesi yanvarniñ 15 tarihlı audio yazısında mahsus hızmet organlarınıñ dersiñ aqqımda 5,5 yıl devamında operativ qıdıruv tedbirler keçirgeni aqqında bildirile. Bu vaqıt devamında men yaşağan yerimni deñiştirmedim, ketmege de planlaştırmadım. Bu qadar uzun tahqiqatnı keçirgen hadimler ise bunı bilmek kerek ediler. Mahsus hızmetlerniñ arketlerini öz salâhiyetlerinden tış çıquv dep saya", - dedi Fevziyev.
Raif Fevziyevniñ advokatı Edem Semedlâyev Rusiye mahkemesiniñ ükmüni izaatlap "müvekkili İslâm aqqında laf etkeni içün 17 yılğa apis etilgenini" dedi.
2021 senesi avgust ayında Rusiye quvetçileri Qırımda birden beş qırımtatarınıñ evini tintti. Soñra faaller Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında Zaur Abdullayev, Aqmescit rayonında Raif Fevziyev tutuldı.
Raif Fevziyev ve Cebbar Bekirov Rusiye Ceza kodeksiniñ 205.5 maddesiniñ 1-inci qısmına istinaden (Terror teşkilâtınıñ faaliyetini teşkil etüv), qalğanları ise Rusiye Ceza kodeksiniñ 205.5 maddesiniñ 2-nci qısmına istinaden (Terror teşkilâtınıñ faaliyetinde iştirak etüv) şübheli ola. Avgustnıñ 17-nde ve 18-nde Rusiye qadıları tutulğanlarnı nezaret altına aldı. Tutulğanlar ya da advokatları yañı qabaatlavlarnı tefsir etmey.
Qırım Muhtar Cumhuriyeti ve Aqyar prokuraturası qırımtatarlarnıñ evlerinde keçirilgen yañı tintüvler ve tutuvlarnen bağlı cinaiy tahqiqat açılğanını bildirgen edi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
