Şimdi Emiruseinov Saratov vilâyetiniñ Balaşov şeerinde apiste buluna. Ükümge köre, o, apiste bir yıldan ziyade oturmamalı edi. Bu müddet endi bozuldı, dep qayd etti Lilâ Gemeci.
''FSİN vekilleriniñ mantığı pek meraqlı edi. Olar Cenübiy okrugınıñ arbiy mahkemesiniñ ükümini öz tarzında añlatalar. Mahkeme qararına qadar SİZO-da bulunğan müddet sert rejimli koloniyada apis cezasınıñ umumiy müddetine kirsetilmeli. Apishaneniñ kurort degil de, ceza yerine çevirilgenine şaşqanıma cevap olaraq bir şey aytılmadı", - dep tarif etti Gemeci.
Bundan da ğayrı, RF Cezalarnı yerine ketirüv federal hızmetiniñ vekili, imayecilerniñ dava arizasına Cenübiy okrugınıñ arbiy mahkemesiniñ vaqtı aqqında izaatını ilâve etmegeninden memnün degil edi.
Bundan evel mahkeme Qurman "Hizb ut-Tahrir" gruppasınıñ diger mabüsleri Arsen Abhayırov ve Eskender Abdülganiyevniñ SİZO-da tutulması müddetini esapqa almaqtan red etti. Emiruseinov ve onıñ imayecileri Qurman rayon mahkemesiniñ qararına itiraz bildirecekler.
Siyasiy mabüsniñ aytqanına köre, şimdi onıñ qan şeker seviyesi köterildi. O pek azdı, amma özüni yahşı duya. Lilâ Gemeci qırımtatarğa tibbiy-içtimaiy ekspertizağa ariza yazmağa tevsiye etti, onıñ neticelerine köre, oña saqatlıq gruppası belgilenecek. Bundan da ğayrı, aşayt şaraitiniñ qolaylaştırılmasına ve dietik aşnıñ berilmesine yardım etecek.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
2020 senesi noyabrniñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
