Rusiyeniñ Vlasiha (Moskva vilâyeti) İstinaf arbiy mahkemesi "Qırım musulmanları davası"nıñ mabüsleri Ekrem Kroş, Ayder Asanov, Löman Zekiryayev, Osman Abdurazakov ve Refat Seydametovnıñ tevqif müddetini uzatuv şikâyetini red etip, olarnı 2024 senesi mayısnıñ 3-ne qadar SİZO-da qaldırdı.
Bu aqta "Qırım birdemligi cemaat birleşmesi advokat Lilâ Gemeciniñ malümatına atıf etip bildire.
Birleşmeniñ yazğanına köre, Gemeci mahkeme esnasında bozuvlar aqqında bildirdi. Mahkeme, imayesi tarafından berilgen şikâyet arizasınıñ kopiyasını mabüslerden biri - Ekrem Kroşqa bergenini bildirdi. Kroşnıñ özü ise vesiqalarnı almadı. Qalğan dört kişige, Ayder Asanov, Leman Zekeryayev, Osman Abdurazakov ve Refat Seydametovğa, kopiyası öyle de berilmedi. Olarnıñ imzaları da dava malümatlarında yoq edi.
Rusiyeniñ Rostov-na-Donu şeerindeki Cenübiy okrugınıñ arbiy mahkemesinden, istinaf mahkemesine, beş mabüs de şikâyetlerniñ kopiyasını almaqtan red etkenini bildirdiler. Qırımlılarnıñ aytqanına köre, bu vesiqalarnı da bermediler.
İmaye mahkeme oturışını başqa künge qaldırmağa rica etti, amma mahkeme bunı red etti. Advokat ve advokatlarğa azırlanmaq içün tek yarım saat berildi. Neticede mahkeme imayecilerniñ muracaatlarını red etip, beş qırımlınıñ sıñırlav tedbirini uzattı.
Daa evel haber etilgenine köre, Rusiyeniñ Rostov-na-Donu şeerindeki Cenübiy okrugınıñ arbiy mahkemesi Canköy rayonından Ekrem Kroş Ayder Asanov, Leman Zekiryayev, Osman Abdurazaqov ve Refat Seydametovnıñ SİZO-da apis müddetini 2024 senesi mayısnıñ 3-ne qadar uzattı.
2023 senesi yanvarniñ 24-nde saba Canköy rayonında Rusiye quvetçileri qırımtatarlarnıñ evlerinde tintüvler keçirdi: Ekrem Kroş, Ayder Asanov, Refat Seydametov, Osman Abdurazakov, Löman Zekiryayev ve Halil Mambetovnıñ evlerinde.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
