Qırımtatar Milliy Meclisiniñ muavini Nariman Celâl ve ağa-qardaş Asan ve Aziz Ahtemovlarnıñ davasında ekspertler 15 standartnıñ bozuluvını qayd etkenler. Bunı "Qırım esnası" haber ete.
Eñ çoq bozuv mahkemeniñ mustaqilligi ve tarafdarsızlığınıñ temin etilmesi ile mudafaa aqqınıñ ömürge keçirilmesinde qayd etilgen.
Uquq qoruyıcılarnıñ esabatında, Rusiyeniñ nezareti astında olğan Qırım Yuqarı mahkemesinde mahkeme esnasınıñ açıqlığını saqlamaq içün belli bir ıntıluv bar edi, amma buña baqmadan bu davada açıqlıqnı sıñırlağan eñ az 12 fakt ve areket qayd etilgen.
Davanıñ temyiz mahkemesinde baqılması bütünley açıqlıq printsiplerine zıt edi ve diñleyicilerniñ, jurnalistlerniñ yaqalanması ile oldı.
Bundan ğayrı ekspertler taraflarnıñ musaviylik standartlarınıñ bozuluvını qayd ettiler. Şu cümleden, mahkeme tahqiqatı vaqtında başlanğıç mahkemesinde taraflar olarnıñ noqta-i nazarını isbatlamaq içün müim olğan 45 muracaat berdiler. Olardan qbaatlayıcı tarafqa 15-ten 3-nde red etildi, mudafaa tarafına 27-den 23-nde red etildi.
Belli olğanına köre, Qırımtatar Milliy Meclisiniñ birinci muavini Nariman Celâl ve Asan ve Aziz Ahtemovlar oktâbrniñ 2-nde Aqmescitteki SİZO-2-den alındı ve Rusiyedeki apishanelerge avuştırıldı.
2022 senesi sentâbrniñ 21-nde Rusiye kontrolindeki Qırımnıñ Yuqarı mahkemesi Nariman Celâlnı 17 yıl sert rejimli koloniyada qalmasına üküm etti. Bundan ğayrı, 700 biñ ruble para cezası berildi ve azatlığı 1,5 yılğa sıñırlandı.
Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
