Rusiye Federatsiyası kontrolindeki Aqmescitniñ Kiyev rayon mahkemesi, advokat Emil Kurbedinovnıñ telegram kanalında studentlerni arbiy komissarlıqqa çağırğanına dair yazısı içün 30 biñ ruble miqdarında para cezasını bermege qarar berdi. Bu aqta uquqçı "Qırım birdemligi"ne bergen izaatında bildirdi.
"Apellâtsion basamaqta menim ve imayemniñ bütün delilleri kene de körmemezlikke uruldı. Bundan da ğayrı, memuriy protokol tizilgende ve mahkeme oturışı vaqtında birinci instantsiya qararında milliy uquq bozulğan edi. Advokat olaraq meni memuriy taqip etüvde halqara uquq da bozulğan edi, şu cümleden, advokatlarnıñ cemiyet içün müim olğan malümatnı tarqatmaq ve bu faaliyet içün taqip etilmemek aqlarını qorçalav", — dep qayd etti Kurbedinov.
Kurbedinov, qararğ razı olmağanını ve şikâyet etecegini qayd etti, ihtimal, kassatsion mahkemede, ileride halqara mahkemede de.
Kurbedinov advokat-aq qorçalayıcı. O, Rusiye akimiyeti yarımadanı ilhaq etken soñ taqip etip başlağan qırımtatarlarnı qorçalay. Advokat Qırımda insan aqlarınıñ bozuluvına diqqat celp etmege tırışa.
Fevralniñ 15-nde Aqmescitte Rusiyeniñ Ekstremizm ile küreş merkeziniñ hadimleri advokat Emil Kurbedinovnı yaqaladılar.
Adliyecige qarşı "Kütleviy haber serbestliginiñ bozuluvı" maddesine istinaden protokol tizildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
