Rusiyeniñ Krasnodar temyiz mahkemesi, Kezlev şeer mahkemesiniñ Kezlevdeki Ukraina ortodoks kilsesiniñ ibadethanesiniñ yıqıluvı aqqında qararına qarşı istinaf şikâyeti içün müddetni yañarttı. Bunı aprelniñ 9-nda ukrain advokatı ve uquq qoruyıcı Sergey Zayets bildirdi.
«Bu daa soñ ğalebe degil, istinafta da er şey ola bile, amma bu da yahşı bir haberdir», – dep yazdı o.
UOK Qırım yeparhiyasınıñ arhiyepiskopı Kliment bu haberni şimdilik daa tefsir etmedi.
2021 senesi martnıñ 15 Aqmescit ve Qırım mitropoliti Kliment, «Kezlev şeeri boyunca Federal idaresiniñ icracılar hızmetinden» ibadethaneniñ acele yoq etüvi aqqında nevbetteki talabını alğan.
Ukraina Pravoslav kilsesi Qırım yeparhiyasınıñ arhiyepiskopı Kliment Qırım akimiyeti ibadetler keçirilgen Aqmescitteki Kafedral kilseniñ binasını martnıñ soñuna qadar boşatmağa talap ete, dep bildirgen edi.
Fevralniñ 13-nde Qırımnıñ Rusiye mal-mülk nazirligi Kyiv patriarhatı Ukraina pravoslav kilsesiniñ Qırım yeparhiyasına yollanğan talap yañı qurulğan Ukraina Pravoslav kilsesine keçken Kyiv patriarhatı Ukraina pravoslav kilsesiniñ yeparhiyası ile tizilgen añlaşmanıñ bitmesinen bağlı, dep bildirdi.
