Rusiyeniñ Vlasiha şeerindeki (Moskva vilâyeti) İstinaf arbiy mahkemesi iyünniñ 5-i, 8-i ve 9-nda advokatlarnıñ Bağçasaraydaki ekinci «Hizb ut-Tahrir davası» mabüsleriniñ apiske alınmasına qarşı istinaf şikâyetlerini baqtı.
«Qırım birdemligi» cemaat birleşmesi bildirgenine köre, şikâyetler qanaatlendirilmedi. Qırımlılar avgustnıñ 13-ne qadar SİZOda qalacaq.
«İyünniñ 9-nda Timur İbragimovnen bağlı soñki şikâyet baqıldı. Mahkeme formal oldı, esas insan aqları bozuldı ve Cenübiy okrugınıñ arbiy mahkemesiniñ qararı bütün mabüsler boyunca deñiştirimeldi», – dep ayttı advokat Lilâ Gemeci.
İyünniñ 5-nde olğan oturışuvda advokatlar sekiz müvekkili 3 metr kârelik, penceresiz ve avalandırılmağan odada qaldı, dep bildirdi. Mahkeme 12 saat devam etti.
Faallerniñ bildirgenine köre, iyünniñ 8-nde mahkeme aynı şaraitlerde oldı. Dava mabüsleri bu mahkemede iştirak etmege razı olmayıp narazılıq bildirdi. Advokatlarnıñ aytqanına köre, mabüsler laf etmedi, mahkeme suallerine cevap bermedi, «Aqiqat yasaq altında», «Fikir içün taqip», «Yamanlıq tamırı – 2003 Rusiye Federatsiyası Yuqarı Şurasınıñ qararı» yazuvlı şiarlarını köterdi.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqıp başladı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
