Aluştadaki Rusiye mirovoy mahkemesi imam Yusuf Aşirovnıñ davasını toqtattı. Onı Rusiye qanunlarınıñ talaplarını bozıp, missionerlik yapqanında qabaatlağan ediler. Bu aqta «Qırım birdemligi» haber ete.
Uquqçı Nazim Şeyhmambetovnıñ aytqanına köre, mahkeme Aşirovnıñ areketlerinde uquq bozuvlarını tapamadı.
«Aşirov on yıllar devamında musulmanlar ögünde cemaat borcunı yerine ketire... Eki yüzden çoq insan muracaatnı imzaladı, anda imam faaliyeti devamında cuma vaazlarını berdi ve diger ibadetler yaptırdı, dep aytıla. Bunı mahkemede sorğuğa çekilgen şaatlar da tasdıqladı. Bunı o, dini ve cemaat ögündeki mesüliyetinen añlattı. Mahkeme bu delillerge razı oldı», – dep qayd etti Şeyhmambetov.
İmam Yusuf Aşirovnıñ fikirince, onıñ dava temelinde «camini reyder zaptı» bar.
Meni küçnen alğanlar. Avtomatlı, zırhlı yelekli insanlar keldi. Vazifemden çıqarmaq içün eki künge qapatqanlar», – dep ayttı Aşirov.
Noyabrniñ 23-nde Rusiye quvetçileri tintüvler keçirip, «Aluşta» musulman din cemiyetiniñ üç azasını tuttılar: Yusuf Aşirov, Vilen Усеinov ve Zinur Appazov. Neticede, Aşirov eki künlik, Усеinov - 10 künlik, Appazov - 5 künlik apis cezasını aldı.
Daa soñra Rusiye quvetçileri Aluştadaki musulman diniy cemiyetiniñ reisi Abdul Gafarovnıñ evinde tintüv keçirdi, bundan soñ «Ekstremizmge qarşılıq kösterüv merkeziniñ» hadimleri Abdul Gafarovnı Aluştadaki Rusiye politsiyasınıñ bölügine alıp ketti. Oña qarşı RF Memuriy cinayetler qanunnamesiniñ 20.29 maddesine köre memuriy protokol tizildi (Federal ekstremist materiallar cedveline kirsetilgen ekstremist materiallarnıñ kütleviy darqatıluvı, em de olarnı kütleviy darqatıluv maqsadınen azırlav ya da saqlav).
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
