Rusiye Federatsiyasınıñ İstinaf arbiy mahkemesi 19 yıl sert rejimli koloniyada qalmasına üküm etilgen «qırımlı musulmanlar davasının» mabüsi İsmet İbragimovnıñ ükmüni deñiştirmedi. Bu aqta «Qırım birdemligi» cemaat birleşmesi haber ete.
Advokat Emil Kurbedinovnıñ qayd etkenine köre, mahkeme oturışuv vaqtında ana-babanıñ sorğusı aqqında malümatnı davadan çıqarmağa razı oldı.
«Ükümde mahkeme oturışuvı vaqtında ana-babasınıñ sorğuğa çekilgeni qayd etilüvini İsmet İbragimov özü ayttı. Lâkin olarnı mahkeme oturışuvı vaqtında sorğuğa çekmegen ediler. Bu şey böyle ükümler nasıl uydurılğanını kene isbatlay», – dep qayd etti uquqçı.
Soñki sözünde İbragimov onıñ davası faal insanlar fikirleri ve diniy baqışları sebebinden taqip etilgenine esaslana, dep ayttı.
«Qırımtatarlarğa qarşı repressiyalar», – dep qayd etti o.
2020 senesi iyülniñ 7-nde Rusiye uquq qoruyıcıları yedi qırımtatarını tuttı: Emil Ziyadinov, İsmet İbragimov, Zekirya Muratov, Vadim Bektemirov, Alim Sufyanov, Seyran Hayretdinov mahkemede apiske alındı ve Aqmescit tahqiqat izolâtorına avuştırıldı. 1-inci derece saqatı olğan Aleksandr Sizikov ev apsine alındı. Tutulğanlar Rusiyede yasaqlanğan «Hizb ut-Tahrir» diniy teşkilâtı ile alâqaları bar olğanında qabaatlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
