Rusiyeniñ Rostov-na-Donu şeerindeki Cenübiy okrugınıñ arbiy mahkemesi 2026 senesi Boşnıñ 12-nde keçken sene Quralayda hırsızlanğan Hatice Buyuhçanğa qarşı cinaiy davanıñ baqılmasını bitirdi. Bu aqta "Qırım esnası" aq qoruyıcı teşebbüsi bildire.
Aq qorçalayıcılarnıñ bildirgenine köre, Rusiye mahkemesi Qırımlını devlet hainliginde, terakt azırlağanında, em de patlayıcı maddelerni saqlağanında ve taşığanında qabaatlı tanıdı. Çıqarılğan ükümge köre, oña umumiy rejimli tüzetüv cezahanesinde 17 yıl ve 400 000 ruble miqdarında para cezası ve bir buçuq yıl azatlıq sıñırlaması cezası belgilendi.
"Qırım esnası" yazğanına köre, mahkemeniñ resmiy saytında ve bu kibi taqipler aqqında malümat tarqatqan diger ananeviy menbalarda Hatice Buyuhçannıñ qabaatlavı aqqında iç bir malümat yoq.
Aq qorçalayıcılar Rusiye kütleviy haber vastalarından alınğan bir parçanı arbiy mahkemeniñ matbuat hızmetine atıfta bulunıp ketire: "Buyuhçannıñ 2024 senesi Quralay ve Oraq ayları arasında Ukrayina territoriyasında bulunıp, Ukrayina havfsızlıq hızmetinen işbirligine celp etilgeni belli oldı. Daa soñra o, Qırımdaki arbiy hızmetçilerniñ yaşağan yerlerine kelip, öz başına yapılğan patlayıcı cihaznı yapmaq içün kerek olğan parçalarnı satın aldı. 2025 senesi Quralaynıñ 5-nde Buyuhçan patlayıcı madde, patlayıcı cihaz, uzaqtan patlavnı kerçekleştirmek içün radiodan idare etilgen icra cihazını satın aldı ve aynı şu künü bütün parçalarnı saqlav yerine ketirdi".
Aq qorçalayıcı teşebbüsiniñ qayd etkenine köre, mahkeme esnası açıq degil. Böylece, mahkemeniñ resmiy saytında mahküm etilgenniñ ve dava taraflarınıñ malümatları gizlengen, bu ise mahkeme oturışuvlarınıñ tarihı ve vaqtı aqqında malümatnıñ berilmesini imkânsızlaştıra ve mahkeme esnasınıñ açıqlığını boza. Bundan da ğayrı, mahkeme qararı çıqarılğan soñ, mahkeme qararı çıqarılğan yer ve vaqıt aqqında malümat dava kartında peyda oldı.
Evel Qırım.Aqiqatqa bildirilgeni kibi, 2025 senesi Quralaynıñ 6-nda saba Hatice Buyuhçan Eski Qırımdan Aqmescitke avtobusnen ketkende ğayıp oldı. Onıñ telefonı söndürilgen edi, tuvğanları onıñ bulunğan yerini tapıp olamadı. Amma soñra Rusiye ofitserine qarşı terakt azırlağanında qabaatlanğanı aqqında malümat peyda oldı.