Rusiyeniñ Rostov-na-Donudaki Cenübiy okrugınıñ arbiy mahkemesi ekinci Bağçasaray "Hizb ut-Tahrir davası"nıñ iştirakçileriniñ apis müddetini uzattı, dep bildire Qırım.Aqiqat mühbiri.
Böylece, Timur İbragimov, Marlen Asanov, Edem Smailov, Server Mustafayev, Memet Belâlov, Seyran Saliyev, Server Zekiryayev ve Ernes Ametovnı 2020 senesi mayıs 13-üne qadar SİZOda tutulacaq.
"Bugün Cenübiy okrugınıñ arbiy mahkemesi ekinci Bağçasaray "Hizb ut-Tahrir davası"nıñ iştirakçileriniñ apis müddetini uzattı. Prokuror, sıñırlav tedbirini deñiştirmek içün sebep yoq dep bunı añlattı. Bundan ğayrı o, muşterilerimiz şaatlarğa tesir ete, mahkemeden gizlene ya da bir sey etip adaletke qarşı çıqa bilecegine atıf etti. Bu, aslında, Cinaiy kodeksiniñ nizamnameleridir, amma qanun, nimamnamelerniñ kerçek amellernen tasdıqlanmasını talap ete. Prokuror iç bir misal ketirmedi, özüni bunen zametke qoymay, çünki mahkeme onıñ muracaatını qanaatlendirmek içün bu yeterlidir", - aytıp berdi advokat Nazim Şeyhmambetov.
Noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqmağa başladı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
