İşğal etilgen Qırımnıñ eki Kezlev sakini Bondarenko Yevgeniya ve Proşkina Yevgeniya Rusiye Federatsiyasınıñ ordusını «itibardan tüşürgen lafları» içün 30 biñ ruble para cezalarını alğanlar. Bu aqta Rusiye tarafdarı bloger Aleksandr Talipov «Krımskiy SMERŞ» Telegram kanalında bildirdi.
«Tez tapıldı ve denatsifikatsiyaları yapıldı. Mahkeme er birine 30 biñ ruble para cezasını berdi. Kezlev sakinleri, biri qave saibi, ekincisi hadimi ordumıznı itibardan tüşürgen laflar ayttı. Qave de qapatılsa, yahşı olur, Ukrayınada açıp çalışsınlar», – dep aytıla haberde.
Bu malümatnıñ doğru olıp olmağanını teşkermek mümkün degil.
Daa evel berilgen malümatqa köre, Talipovnıñ şikâyeti esasında Telegram çatında Ukrayınağa ğalebe tilegeni içün Aqmescit sakini Natalya Sadovskayağa qarşı Rusiye ordusını «itibardan tüşürüv» protokolını tizdi.
Rusiye tarafdarı bloger Aleksandr Talipov «Krımskiy SMERŞ» ve «TalipoV Online Z» Telegram kanallarında Ukrayınağa qoltutqan qırımlılarnıñ şahsiy malümatını derc ete. Talipovnıñ şikâyetleri neticesinde qırımlılarnı Rusiye ordusını «itibardan tüşürgeninde» qabaatlap, memuriy ve cinaiy mesüliyetke çekeler.
Qarasuvbazar tehnikumınıñ sabıq ocası Andrey Belozerov içtimaiy ağlarda Ukrayına yırları ve Rusiyege qarşı lafları sebebinden Talipovnıñ şikâyetlerinden soñ üç yıl apis cezası berile bile.
Ukrayına prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
2022 senesi noyabr ayında «Krım SOS» aq qorçalayıcı teşkilâtı 9 ay devamında Rusiye mahkemeleri Rusiye ordusını «itibardan tüşürüvnen» bağlı 200-den çoq memuriy dava baqtı. Qırımlılarğa Ukrayına yırlarını diñlegenleri, Ukrayına Silâlı quvetleri ve Ukrayınağa qoltutuv şiarlarını yazğanları içün para cezalarını bereler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
