Link açıqlığı

Saatnıñ esas haberi

Rusiye mahkemesi Qırım sakinine Putinni «aqaretlegeni», Rusiye ordusını «itibardan tüşürgeni» ve «poliske boysunmağanı» içün ceza berdi


Qırımlı Ukrayinada yapqan areketlerini tenqid etkeni içün «Rusiye ordusınıñ itibarını bozğanında» qabaatlandı
Qırımlı Ukrayinada yapqan areketlerini tenqid etkeni içün «Rusiye ordusınıñ itibarını bozğanında» qabaatlandı

Rusiye kontrolindeki Qırımnıñ İslâm Terek rayon mahkemesi yerli sakinge eki maddege istinaden – «ufaq yaramazlıq» ve Rusiye ordusını «itibardan tüşürüv» – para cezasını berip, «Çat Ruletkada» aytqanları içün 10 künge apiske mahküm etti.

Böyleliknen, 55 yaşında adamğa 50 biñ ruble para cezası berildi, çünki o, aytılğanına köre, videoçat vaqtında «küfür etti ve Rusiye Federatsiyası prezidentini aqaretledi».

Bundan ğayrı, qırımlı Ukrayinada yapqan areketlerini tenqid etkeni içün «Rusiye ordusınıñ itibarını bozğanında» qabaatlandı. Rusiye mahkemesi bunı Rusiye Silâlı Quvetlerini «itibardan tüşürüv» olaraq tasnif etti ve 45 biñ ruble para cezasını berdi.

Berilgen malümatqa köre, operativ-qıdıruv tedbirleri vaqtında erkek pasport köstermedi ve «polis işine mania oldı».

Rusiye Federatsiyası büyük istilâğa başlağan soñ Rusiye ordusınıñ «diskreditatsiyası» aqqında Memuriy cinayetler kodeksiniñ 20.3.3 maddesi kirsetildi. Rusiye-Ukrayına cenki aqqında malümat tarqatqanlar ve Kremlniñ noqta-i nazarına zıt kelgen er angi fikir bildirgenler taqip etile.

Ukrayina prezidentiniñ Qırım Muhtar Cumhuriyetindeki temsilciliginiñ malümatına köre, 2024 senesi dekabr ayınıñ soñuna qadar Qırımda Rusiye ordusınıñ diskreditatsiyası maddesine istinaden 1126 memuriy dava açılğan.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

XS
SM
MD
LG