Sentâbr 26-sında Rostov-na-Donu şeeriniñ Şimaliy-Kavkaz okrugınıñ arbiy mahkemesi, terrorcılıq propagandasında qabaatlanğan cemaat jurnalisti, bloger Nariman Memedeminovnı sorğuğa çekti. Bunı Qırım.Aqiqat mühbirine advokat Emil Kurtbedinov aytıp berdi.
"O, 2014 senesinden başlap cemaat jurnalisti olğanını , mahkeme protsessleri aqqında haber etkenini, press kartası olmağanını ve bu iş içün aqça qazanmağanını añlattı. O, Qırımda 2014 senesinden soñ mustaqil jurnalistler qalmağanından sebep, bu - mecburiy bir iş olğanını añlattı. Nariman, prokurornıñ suallerine cevap bermekni red etti, amma anketa malümatı aqqında mahkeme suallerine cevaplanmağa razı oldı", - aytıp berdi advokat.
Kurbedinov, mahkeme oturışını oktâbr 21-ine qaldırmağa muracaat etti, çünki imaye dinşınaslıq ekspertizasını azırlay ve ileride onı, Memedeminovnıñ qabaatsızlığı delili kibi kösterecek ola.
"Biz, dinşınaslıq ekspertizasını azırlaymız, o, Nariman çekip, YouTubeda yerleştirgen videolarında ne aqqında laf yürsetilgenini añlatacaq. Amma mahkeme biraz toqtamaqnıred etti. Ekspertiza azır olğanda, biz onı ükümniñ apellâtsiya şikâyetine delil kibi qoşarmız", - aytıp bere advokat.
Daa evel Rostov-na-Donu şeeriniñ Şimaliy-Kavkaz okrugınıñ arbiy mahkemesi aynı şu oturışında, jurnalistler Aleksandra Yefimenko, Mihail Batrak, Seytumer Seytumerov ve Taras İbragimovnıñ sorğulamasını red etti. Olar, cemaat jurnalisti, bloger Nariman Memedeminovnıñ davası boyunca imaye şaatları kibi kösterilgen ediler.
