Rusiye arbiy istinaf mahkemesi "Hizb ut-Tahrir davası birinci Canköy gruppasınıñ" mabüslerini tevqifli qaldırdı. Bunı advokat Emil Kurbedinov haber etti.
Onıñ sözlerine köre, mahkeme mudafaa ve qabaatlav taraflarınıñ delillerini diñlegen ve tevqif kibi sıñırlama tedbiriniñ uzatılması ile bağlı evelki mahkeme qararını quvette qaldırğan. Mudafaa tarafınıñ delilleri mabüsler esassız şekilde bu qadar uzun müddet SİZO-da tutulğanlarından ve bu olarğa basqı usulı kibi sayılğanından ibaret edi.
Kurbedinov, bütün mabüslerniñ alı qanaatlendirici ve olar destek içün teşekkür etkenlerini bildirdi.
Bunıñ kibi aynı qararnı mahkeme "Hizb ut-Tahrir davası ekinci Aqyar gruppasınıñ" mabüsleri Cebbar Bekirov, Rustem Murasov, Zavur Abdullayev, Rustem Tairovğa çıqarğan.
2022 senesi avgustnıñ 11-nde saba faaller işğal altındaki Qırımda Rusiye quvetçileri qırımtatarlarnıñ evlerini tinte, dep bildirdi. Advokatlarğa kirmege izin berilmedi, bazı yerlerde cep telefonı bağı söndürildi. Altı er adamı – Vilen Temeryanov, Enver Kroş, Seitâya Abbozov, Murat Mustafayev, Edem Bekirov ve Rinat Aliyev Rusiyede yasaqlanğan «Hizb ut-Tahrirde» iştirak etkeninde qabaatlanıp tutuldı.
Ukrayına prezidentiniñ Qırım Muhtar Cumhuriyetindeki temsilciligi qırımtatarlarnıñ evlerinde keçirilgen tintüvlerni takbih etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
