Rusiyeniñ nezareti astında olğan Aqmescitniñ Kiyev rayon mahkemesiniñ binası yanında yaqalanğan qırımtatar faalerine orduğa celpnameler berdiler. Bunı Rusiyeni desteklegen bloger Aleksandr Talipov bildirdi.
"20.2.2 memuriy maddesine binaen (Kütleviy toplaşuvda iştirak etüv) yaqalav ve protokol tizilüvden soñ rayon bölügine arbiy komissarlıqnıñ temsilcisi davet etildi. Öz nevbetinde o er keske celpnameler yazıp berdi", - dep yazdı Tplipov.
Onıñ sözlerine köre, yaqalanğanlar celpnameler almaqtan red etkenleri içün Rusiye quvetçileri olarğa qarşı kerekli protokollar tizgen.
Keçende Rusiyeniñ nezareti astında olğan Aqmescitniñ Kiyev rayon mahkemesiniñ binası yanında evel yaqalanğan qırımtatarlarnıñ mahkeme oturışına kelgen faallerni yaqaladılar.
Avgustnıñ 24-nde Bağçasarayda ve Bağçasaray rayonında saat 4-te Rusiye quvetçileri qırımtatarlarnıñ Ruslan Asanov, Seydamet Mustafayev, Remzi Nemetulayev, Abdulmecit Seytumerov, Amethan Umerov ve Eldar Yakubovnıñ evlerinden tintüv keçirdi. Berilgen malümatqa köre, Nimetulayev ve Asanovğa Rusiye Ceza qanunnamesiniñ 205.5 maddesiniñ birinci qısmına binaen (terrorristik teşkilâtnıñ faaliyetini teşkil etüv), Amethan Umerov ise Rusiye Ceza qanunnamesiniñ 205.5 maddesiniñ ekinci qısmına binaen (terroristik teşkilâtnıñ faaliyetinde iştirak etüv) qabaatlanğan.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
