«Prokuror sıñırlav tedbirini daa üç ayğa uzatmaq muracaatını berdi. O, müddet uzatılmasa, olar saqlana, şaatlarğa tesir ete, delillerni yoq ete bile, dep ayttı. Bir söznen, adet üzre aytqan bütün ibareleri. Yigitler öz tarafından bunı inkâr etti, imayeciler de öyle», – dedi advokat Edem Semedlâyev.
Onıñ bildirgenine köre, iç bir mahkeme oturışuvında imaye delillerine qulaq asqan yoq.
«Bugünki oturışuvda erkeklerniñ sıñırlav tedbirleri kene üç ayğa uzatıldı. Bu qararğa itiraz bildirip, delillerimizni eşitecekler ve sıñırlav tedbirini iç olmağanda ev apsine deñiştirirler dep ümüt etecekmiz», – dep qoştı Edem Semedlâyev. Nevbetteki mahkeme oturışuvı martnıñ 10-nda olacaq.
«Qırım platforması» sammitiniñ ertesi künü, 2023 senesi avgustnıñ 24-nde, Qırımda Rusiye uquq qoruyıcıları altı qırımtatarını tuttı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Umerov, Eldar Yakubov ve Abdulmecit Seytumerovnıñ evlerinde tintüvler keçirildi.
Aynı şu künü Rusiye kontrolindeki Aqmescitniñ Kiyev rayon mahkemesi üçüni apiske aldı – Ruslan Asanov, Amethan Umerov ve Remzi Nimetulayev eki ayğa SİZOğa yollanıldı. Tutulğanlar Rusiye Federatsiyası Ceza kodeksiniñ 205.5-nci maddesiniñ birinci qısmı – terrorcı teşkilâtnıñ faaliyetini teşkil etmek ve böyle teşkilâtnıñ faaliyetinde iştirak etmek – şübhesinen qabaatlandı. Laf Rusiyede yasaqlanğan «Hizb ut-Tahrir» teşkilâtı aqqında kete.
2024 senesi iyün ayında Aqmescitte Rusiye kontrolindeki Kiyev rayon mahkemesi altı qırımtatar faalini apishanede qaldırdı. Seydamet Mustafayev, Eldar Yaqubov, Abdulmecit Seitümerov, Ruslan Asanov, Amethan Umerov ve Remzi Nimetulayev 2024 senesi noyabrniñ 24-ne qadar SİZOda qalacaqlar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
