Rusiye Yuqarı mahkemesi yarım yıl evelsi dört qırımtatarına qarşı Bağçasaraydaki birinci «Hizb ut-Tahrir davası» boyunca çıqarılğan ükümniñ temyiz arizasını iyülniñ 11-nde baqacaq. Bu aqta advokat Edem Semedlâyev mezkür dava boyunca mahküm etilgen Zevri Abseitovnı SİZOda ziyaret etken soñ Qırım.Aqiqat mühbirine bildirdi.
«Zevri Rostov vilâyetiniñ Novoçerkassk şeerindeki №3 SİZOda alâ daa tutula. Onı SİZOnıñ mahsus blokuna yerleştirdiler, memuriyet ağır terror maddesine esaslana. İyülniñ 11-nde Rusiye Yuqarı mahkemesinde baqılacaq temyiz arizasını muzakere ettik. Halqara uquq ceetinden Rusiyeniñ olarnı mahküm etmek aqqı olmağanını laf ettik. Birinci instantsiya mahkemesiniñ qararı qanunsız dep tanılacağına ümütimiz yoq, şunıñ içün kelecek basamaqnı muzakere ettik», – dep tarif etti Semedlâyev.
Advokatnıñ bildirgenine köre, imaye mahkümlerniñ Qırımğa mümkün olğanı qadar yaqın olğan koloniyalarda cezalarını çekmelerini isteycek.
«Ombudsmen Tatyana Moskalkovağa muracaat yazacaqmız, olarnı uzaq regionlarğa degil de, evlerine yaqın bir yerge yollanmalarına yardım etmesini rica etecekmiz», – dedi Semedlâyev.
2018 senesi dekabr ayında Şimaliy-Kavkaz okrugınıñ arbiy mahkemesi Enver Mamutovnı 17 yıl sert rejimli koloniyada qalmasına üküm etti, Ruslan Abiltarov, Remzi Memetov ve Zevri Abseitov 9 yıl sert rejimli koloniyada qalmasına üküm etildi.
Mabüslerden iç birisi qabaatını tanımadı. Olar cinaiy işniñ «siyasiy sebepleri bar», dep qayd etti.
2016 senesi mayısnıñ 12-nde Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede Bağçasaraynıñ dört sakini: Zevri Abseitov, Remzi Memetov, Rustem Abiltarov ve Enver Mamutov tutulıp, terrorizmde qabaatlandı. Olar, Rusiyede terroristik dep tanılğan «Hizb ut-Tahrir» teşkilâtında iştirak etkenlerinde şübeli dep sayıla.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
