Rusiyeniñ Yuqarı mahkemesi "Azov" ukrayin polkunı terroristik teşkilât kibi tanıdı ve memlekette onıñ faaliyetini yasaq etti. Qarar RF Baş prokuraturasınıñ ricasınen qabul etildi.
"Mediazona" Rusiye neşriniñ qayd etkeni kibi, endi polknıñ tarafdarları kibi tanılğan adamlar terrorcılıq maddelerine köre qabaatlana bile.
Evel Rusiye Baş prokuraturası memleketniñ Yuqarı mahkemesine muracaat etip, "Azov" ukrayin polkunıñ "terroristik teşkilât" kibi tanımasını ve memelkette onıñ faaliyetini yasaq etmesini istedi.
Bundan evel "Azov" ukrayin polku Rusiyede yasaq etilgen teşkilâtlar cedveline kirmegen edi. Tek "Azov" timsalleri yasaq edi.
«Azov» polku ve diger Ukraina bölükleriniñ askerleri liman şeeri olğan Mariupolni imaye etti. Şeer mart başından berli qamaçavda edi, askerler «Azovstal» maden kombinatında blok etildi. «Azov» birleşmesi 2014 senesi göñülli batalyonı olaraq quruldı. Temelinde sağcı faaller bar edi. Lâkin «Azovnıñ» bir çoq askeri neonatsist olmağanını, polknıñ özü ise Ukraina Silâlı quvetleriniñ esas qısmı oldı, dep qayd ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
