Rusiyeniñ Soçideki Üçünci umumiy istinaf mahkemesi Aqyarlı "Sarı şeriti" areketiniñ faali Kseniya Svetlişinanıñ ükmüni deñiştirmedi. Bu qararnı rusiyeli mahkemeci Dmitriy Kotçenko çıqardı, dep bildire "Qırım esnası" aq qorçalayıcı leyhası.
Mahkemeniñ matbuat hızmetiniñ bildirgenine köre, oturış devamında mahkeme Rusiye quvetçileriniñ versiyasını qabul etti, oña köre, qadın bir qaç ay devamında "çetel devletiniñ vekillerine" Qırım yarımadasında Rusiye arbiy obyektleriniñ bulunğan yeri aqqında malümat berdi. Bundan da ğayrı, Rusiye telükesizlik hadimleriniñ malümatına köre, o, Aqyarnıñ parklarından birisinde Ukrayina Silâlı quvetlerine qol tutuv ve "Rusiye prezidentini aqaretlegen" yazılar yazğan eken.
"Qırım esnası" yazğanına köre, cinaiy davanıñ yañıdan baqılması qapalı mahkeme oturışında keçti, dava malümatlarında "devlet sırı olğan" malümat bar, dep aytıla. Mahkemeniñ resmiy saytında mabüsniñ malümatı gizlengen, oturışnıñ yeri, künü ve saatı, ükümniñ ilân etilüv künü ve saatı aqqında malümat yoq.
Svetlişinanıñ bu qararğa dair açıq izaatları şimdilik yoq. "Sarı şerit" areketi de daa iç bir türlü izaat bermedi.
2025 senesi orta küz ayınıñ 30-nda Rusiyeniñ kontrolindeki Aqyar şeer mahkemesi "Sarı şerit" faali Kseniya Svetlişinağa qarşı çıqarılğan ükümni yañıdan baqıp çıqtı ve 13 yıl 3 ay apis cezasını tayin etti.
"Sarı şerit" teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.