Rusiyeniñ Kurgan şeer mahkemesi dekabrniñ 21-nde Aqyardaki «Hizb ut-Tahrir davasınıñ» mabüsi Rustem Vaitovnıñ müddetinden evel azat etilmesini red etti. Bu aqta Vaitovnıñ menfaatlarını temsil etken advokat Roman Kaçanov Facebookta haber etti.
Mahkeme, çıqarğan qararında Kurgan şeeriniñ №1 koloniyasında Vaitovğa nisbeten qullanılğan intizam cezasına esaslandı.
«Koloniyanıñ memuriyeti Vaitovnı izolâtsiyada tutmaq içün oña qarşı intizam cezalarını uydura. Vaitov tertip-nizam bozucısı kibi (koloniyağa bu statusta keldi) ve ciddiy madde boyunca qabaatlanğan kişi olaraq… izolâtsiyada tutulmaq kerek. Böyle şaraitler yoq edi, ve tahmin etkenimiz kibi, memuriyet onı izolâtsiyada tutmaq içün ceza izolâtorına, koloniyanıñ iç apishanesine qapatmaq içün ceza uydura edi, çünki cezanı çeküv sert şaraitler otrâdı 2018 senesi oktâbr ayına qadar tamir etilgen edi», – dep añlattı advokat.
Kaçanovnıñ aytqanına köre, mabüs mahkemede söz alıp, baqılacaq qızı bar, dep qayd etti.
«Vaitovnıñ qızı doğğanından saqat, onı baqmaq kerek. Şimdi bunı ömür arqadaşı yapmağa mecbur. Vaitov mahkemeden müddetinden evel azat etilmesini rica etip, özü içün degil, hasta qızı içün muracaatta bulundı. Prokuror mabüsniñ müddetinden evel azat etilmesine qarşı olmaz edi, dedi, amma koloniya tarafından intizam cezaları bar», – dep tarif etti advokat.
2017 senesi sentâbr ayında Rostov-na-Donu şeerindeki Şimaliy-Kavkaz okrugınıñ arbiy mahkemesi üküm çıqarıp, «Hizb ut-Tahrir davasınıñ» mabüsleri Aqyarlı Ferat Sayfullayev, Rustem Vaitov ve Nuri Primovğa umumiy rejimli koloniyada beş yıl apis cezasını berdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
