Rusiyedeki Kirov vilâyetiniñ Omutninsk rayon mahkemesi martnıñ 13-nde Aqyardaki «Hizb ut-Tahrir davasınıñ» mabüsi Ferat Sayfullayevniñ şartlı olaraq müddetinden evel azat etilüv meselesini baqacaq. Bu aqta «Qırım birdemligi» teşebbüsi advokat Emil Kurbedinovnıñ malümatına esaslanıp, Facebookta bildire.
Kurbedinovnıñ özü mahkemege kelemez, Sayfullayevni başqa advokat imaye etecektir. Oturışuv saat 13:30-ğa planlaştırıla.
2017 senesi sentâbr ayında Rostov-na-Donudaki Şimaliy-Kavkaz okrugınıñ arbiy mahkemesi üküm çıqardı. Oña binaen, «Hizb ut-Tahrir davasınıñ» aqyarlı mabüsleri Ferat Sayfullayev, Rustem Vaitov ve Nuri Primov beş yıl apis cezasına üküm etildi.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
