Soçi şeeriniñ Umumiy yurisdiktsiya üçünci istinaf mahkemesi Aqmescitteki «Hizb ut-Tahrir davasınıñ» mabüsi Enver Ametovnı apiste qaldırdı, dep bildirdi advokatı Refat Yunus «Qırım birdemligine». O, Ametovnen beraber oturışuvda Aqmescit SİZOsından videokonferentsiya vastasınen iştirak etti.
«İmayeniñ Ametov Enverni apiste tutmaq içün uquqiy sebepler olmağanına, onı izolâtsiya şaraitlerinde apiste tutmağa acet olmağanına dair delillerine mahkeme qulaq asmadı», – dep aytıla haberde.
Advokatnıñ aytqanına köre, Enver Ametov mahkemede yalıñız fikirleri içün cinaiy taqipke oğrağan Ukraina vatandaşı ve siyasiy mabüs olğanını ayttı.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Edem Yayaçikov – ğayıp oldı, onıñ bulunğan yeri martnıñ 27-nden berli belli degil. Soñra daa bir şübheli Raim Ayvazov tutuldı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
