Rusiye kontrolindeki Aqmescitniñ Kiyev rayon mahkemesi yerli sakinni «Noman Çelebicihan qırımtatar batalyonında iştirak etkeni» içün dört yılğa üküm etti. Bu aqta TASS haber ete.
«Mabüs işbu birleşmeniñ faaliyetini temin etken edi. Qanunsız arbiy birleşmede iştirakini öz isteginen toqtatmaq imkânı olsa da, şübheli uquq qoruyıcı organlarına muracaat etmeyip, batalyonnıñ cinaiy faaliyetinde iştirak etmege devam etti», – dep haber etile.
Qayd etilgenine köre, erkek 2016 senesi batalyonğa qoşuldı. Oña qarşı Rusiye Federatsiyasınıñ Ceza kodeksiniñ 208-inci maddesiniñ 2-nci qısmına istinaden cinaiy dava açıldı – «federal qanunda olmağan silâlı birleşmede iştirak etüv».
Hatırlatamız, işğal etilgen Qırımda «Noman Çelebicihan qırımtatar batalyonında» iştirak etüv manaçığınen taqip etilgen onlarnen insan bar. Bazıları apis cezalarını aldı ve Rusiye apishanelerinde yata.
Rusiye FSBsi «Noman Çelebicihan qırımtatar batalyonını» 2022 senesi «terror teşkilâtları» cedveline kirsetti.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete. Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi. «Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
