Kreml kontrolindeki Aluşta mahkemesi üç genç qızğa Rusiye Federatsiyasınıñ ordusını «itibardan tüşürüv» memuriy maddesine istinaden para cezalarını berdi.
Qırımdaki Rusiye İç işler nazirliginiñ malümatına köre, Aluşta akvaparkından üç animator qız «iş yerinde bulunıp, manası qabul etilmeycek ukrayın yırcısınıñ yırında oynağan».
Qabaatlanğanlar – 19, 20 ve 26 yaşında qızlar. Ekisi Rusiye regionlarından Qırımğa para qazanmağa keldi, üçüncisi Aluştada yaşay. Olarğa 15 biñ ruble para cezaları berildi.
Avgustnıñ 8-nde müellifi Rusiye uquq qoruyıcılarınen işbirligi yapqan bloger Aleksandr Talipov olğan «Krımskiy SMERŞ» telegram kanalında Qırımdaki akvaparknıñ hadimlerinen video peyda oldı. Qızlar anda ukrayın yırcısı Verka Serdüçkanıñ yırında oynay.
Bundan soñ Telegram kanalında başqa video peyda oldı – anda qızlar «tüşünmegen areketleri» içün afu soray, Kreml yolbaşçısı Vladimir Putinge ve «mahsus arbiy operatsiyanıñ» (Rusiye Ukrayınağa qarşı cenkni böyle adlandıra) iştirakçilerine qoltuta.
Rusiyede ve işğali altındaki topraqlarda Ukrayına tarafdarları taqip etile. Rusiyege qoltutqan bloger Aleksandr Talipov Telegram kanalında Ukrayına tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını «itibardan tüşürgeninde» qabaatlanıp, memuriy ve cinaiy mesüliyetke çekile. Ukrayına prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
