Qırımnıñ Rusiye Yuqarı mahkemesi Aluşta şeer mahkemesiniñ qararını tasdıqlap, Aluşta mustaqil musulman cemiyetini şeer camisinde islâm din erbaplarınıñ kitaplarını saqlağanları içün 100 biñ ruble para cezasını ödemege mecbur etti. Bu aqta ''Qırım birdemligi'' haber ete.
"1994 senesinden berli bu yerde faaliyet köstergen kâr maqsadına çalışmağan teşkilât para cezasını töleycek. Yerli sakinler bu cemiyetni, imamnı, reisini ve diger azalarnı bileler ve bu insanlar iç bir vaqıt ekstremizmge çağırmay ediler. Olar öz faaliyetini qanunğa köre alıp bardılar ve qanunsız areketler yapmadılar", - dep ayttı advokat Rustem Kâmiylev ve imayeniñ qararğa itiraz bildirecegini qayd etti.
Rusiye Ekstremizm ile küreş merkeziniñ hadimleriniñ malümatına köre, musulman cemiyeti "ekstremistik materiallarnıñ saqlanmasına izin berdi" ve olar federal cedvelge kirsetildi. Söz beş neşir aqqında kete: ''İslam, İman, İbadet'' Osman Nuri Topbaş, ''Zikrniñ qıymeti'', ''Muhammed Peyğamber-2'', ''Halifelik tarihı'' Abu Bakr as-Sıddik, ''Halifelik tarihı'' Ali ibn Abu Talib kitapları.
Cemilevniñ qayd etkenine köre, ekstremistik malümatnıñ azırlanması ve tarqatıluvı aqqında madde boyunca protokol tek 2023 senesi noyabrniñ 30-nda - camide tintüv keçirilgeninden bir afta keçken soñ, kitaplar tutıp alınğan soñ, tizildi. Aynı protokolğa noyabrniñ 30-nda "Aluşta'' cemiyetiniñ reisi Abdul Ğafarovdan alınğan neşirler de kirdi. Onıñ aytqanına köre, kitaplarnıñ bir qısmı camide degil, bir aftadan soñ evinde tintüv vaqtında alındı.
Noyabrniñ 23-nde Rusiye quvetçileri tintüvler keçirip, ''Aluşta'' musulman diniy cemiyetiniñ üç azasını tuttı: Yusuf Aşirov, Vilen Усеinov ve Zinur Appazov. Neticede, Aşirov eki künlik, Усеinov 10 künlik, Appazov 5 künlik apis cezasını aldı.
Daa soñra Rusiye quvetçileri Aluştadaki musulman diniy cemiyetiniñ reisi Abdul Gafarovnıñ evinde tintüv keçirdi, bundan soñ "Ekstremizmge qarşılıq kösterüv merkeziniñ" hadimleri Abdul Gafarovnı Aluştadaki Rusiye politsiyasınıñ bölügine alıp ketti. Oña qarşı RF Memuriy cinayetler kodeksiniñ 20.29 maddesine köre memuriy protokol tizildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
