Moskva vilâyetiniñ Vlasiha şeer okrugınıñ İstinaf arbiy mahkemesinde noyabrniñ 13-nde Aluştadaki «Hizb ut-Tahrir davasınıñ» istinaf şikâyeti red etildi ve mabüsler apiste qaldırıldı. Böylece, Ruslan Nagayev, Lenur Halilov, Ruslan Mesutov ve Eldar Kantimirov 2020 senesi yanvarniñ 21-ne qadar apiste qalacaq. Bu aqta advokat Ayder Azamatov «Qırım birdemligine» haber etti.
«Oturışuvnıñ başında müvekkillerimiz Rusiye ve halqara qanunlarındaki aqlarınıñ yerine ketirilüvi içün rusçadan qırımtatarcağa çevirecek terciman olmasını rica etti. Mahkeme mesleat odasına ketip, terciman bermege razı olmadı», – dep izaatladı Azamatov.
Mahkeme fikrine köre, qırımtatarlar oturışuvda tercimansız iştirak etmek içün yeterli rusça bile, Rusiye arbits mahkemelerinde ise mahkeme tili rusça ola. İmaye bu qararğa razı olmayıp, reis qadınıñ çetleştirilüvini istedi.
«Muracaat baqıldı ve tahmin etilgen qarar çıqarıldı. Çetleştirmediler, mahkeme soñki söz basamağına keçti. Sıñırlav tedbiriniñ uzatıluvına qarşı istinaf şikâyeti qararı deñişmedi», – dedi advokat.
Ruslan Nagayev ve Eldar Kantimirov Aluştada, Ruslan Mesutov Büyük Lambatta (Malıy Mayak), «Aluşta» yerli din cemiyetiniñ yolbaşçısı Lenur Halilov Körbek (İzobilnoye) köyünde tutulan edi. Halilov ve Mesutov Rusiye Ceza kodeksiniñ 205.5 maddesiniñ 1-inci qısmına istinaden («Terror teşkilâtı faaliyetini teşkil etüv») qabaatlana. Kantimirov ve Nagayev Rusiye Ceza kodeksiniñ 205.5 maddesiniñ 2-nci qısmına istinaden («Terror teşkilâtı faaliyetinde iştirak etüv») qabaatlana. Daa soñra bütün mabüsler Rusiye Ceza kodeksiniñ 30-ıncı maddesiniñ 1-inci qısmı ve 278-inci maddesine istinaden («Evelden añlaşqan gruppa tarafından akimiyetni küçnen zapt etüvge azırlanuv») qabaatlandı, bu madde boyunca 10 yılğa qadar apis cezası berilmesi mümkün.
Dava mabüsleri al-azırda Rostov-na-Donu şeeriniñ №1 tahqiqat izolâtorında buluna, cinaiy dava ise mahkeme tahqiqatında qala.
«Memorial» Aluştadaki «Hizb ut-Tahrir davasınıñ» dört mabüsini siyasiy mabüs dep tanıdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
