Qırımda dekabrniñ 16-nda yañı mayın haberleri sebebinden Rusiye kontrolindeki mahkemeler işini toqtattı, dep haber ete Rusiye ve Qırım kütleviy haber vastaları Qırımnıñ Rusiye mahkeme departamentiniñ idaresine esaslanıp.
«Qırım mahkemeleriniñ mayın etilüvi aqqında sahte haberler devam ete. Böyle haberler bugün bütün mahkemelerge keldi. Mahkemelerniñ işi kene toqtatıldı, hadimleri tahliye etildi, kelgen malümat uquq qoruyıcılar tarafından teşkerile. O yerge ve mahkeme binalarına kiriş sıñırlandı», – dep bildire haberni «Krım 24» Rusiye telekanalı.
Bundan ğayrı, mayın aqqında haberler Bağçasaray, Keriç ve Yedi Quyu rayonlarınıñ tasil müessiselerine de keldi. Bala ve ocalar taliye etildi, mekteplerge kinologlar keldi, dep haber ete «RİA Novosti» Rusiye neşiri.
Şimdi Rusiye uquq qoruyıcıları mezkür haberlerni teşkere.
Hatırlatamız, Rusiye kontrolindeki Qırım yolbaşçısı Sergey Aksenov Qırımda terror telükesiniñ yüksek («sarı») seviyesini dekabrniñ 22-ne qadar uzattı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
