Qırımtatar faali, «Qırım musulmanları davası»nıñ mabüsi İsmet İbragimov 2022 senesi aprelniñ 24-nece tevqifli qalacaq. Münasip qararnı dekabrniñ 23-nde Rostov-na-Donudaki Cenübiy bölgeniñ arbiy mahkemesi çıqardı. Bunı «Qırım birdemligi» cemaat birleşmesi haber etti.
«Prokuror Sergey Aydinov sıñırlama tedbiriniñ deñiştirilmesi içün esaslar deñişmegenini bildirdi. İbragimovnıñ advokatı Ayder Azamatov tevqif muddetiniñ uzatılmasına itiraz etti, çünki qabaatlav tarafı deliller kösterilmesi artıq yekünlegen, şunıñ içün İsmet olarnı yoq etip ve şaatlarğa tesir etip olamaz», – dep yazıla bildirmede.
İbragimovnıñ davası boyunca nevbetteki mahkeme oturışı kelecek sene yanvarnıñ ortasında olacaq.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
