Moskvanıñ Basmannıy mahkemesi martnıñ 24-nden 25-ne keçer gecesi Moskva civarındaki «Crocus City Hall» kontsert salonına qarşı silâlı ücümde qabaatlanğan dört kişini apiske aldı. Ücümde 137 insan elâk oldı, 182 kişi yaralandı.
Dalercon Mirzoyev, Murodali Raçabalizode, Muhammadsobir Fayzov ve Şamsidin Fariduni terrorizmde qabaatlanıp, ömür boyu apis cezalarını aa bile. Apis oturışuvı qapalı oldı.
Basmannıy mahkemesindeki oturışuv salonlarına tutulğanlar köteklengen alda ketirildi. Mirzoyevniñ boynunda beti qapatılğan plastik paket parçaları bar. Raçabalizode tutulğanda qulağı kesildi. Mahkeme fotoresimlerinde başnıñ bu tarafı kösterilmey. Mahkeme ekisi de qabaatını tanıdı, dep bildirdi.
Qabaatlanğanlarğa tercimanlar berildi, ekisi rusça laf etmey. Tahqiqat, tahqiqat gizliligi olmalı ve esnas iştirakçileri ve soy-soplarınıñ telükesizligine esaslanıp, oturışuvnı qapalı şekilde keçirmege rica etti.
Gizli olmağan malümatqa köre, Mirzoyev Rusiyede Novosibirskte qayd olğan edi. 32 yaşında. Evli, dört balası bar, ekizleri bir buçuq yaşında. Murodali 30 yaşında olğanını, evli, balası bar olğanını ayttı.
Şamsidin Fariduni oturışuvda bildirgenine köre, evli, Moskva civarındaki Krasnogorskta qaydı bar, o yerde «Crocus City Hall» de yerleşe. Parket fabrikasında çalıştı. Sekiz aylıq balası bar. Suallerniñ çoqusına tercimansız cevap berdi.
Cenkke qoltutqan saifelerde Fariduniniñ sorğu videosı peyda oldı, o, tiz üstü tura ve bağlanğan. Anda 500 biñ ruble içün öldürmege teklif etkenler, dep bildirdi. Soñra, tahminlerge köre, elektrik aqımnen işkencege oğratılğan fotoresimi peyda oldı.
Dördünci qabaatlanğan kişi, 19 yaşında Muhammadsobir Fayzov, oturışuv salonına teskerede ketirildi, üstünde tek tibbiy halat bar, onıñ altından, tahminlerge köre, siydik torbası körüne. Bundan evel reanimatsiyada edi, sorğu da anda oldı. Tutulğanda köz oyuğından köz çıqarıldı. Silânen tirenmege tırıştı, dep aytıla.
İvanovoda barberşopta çalıştı. Berilgen malümatqa köre, Fayzov şeerde meşur bir berber edi. Apis oturışuvından qadı Timur Vahrameyev yanındaki ekimlerni bile çıqardı.
Tahqiqat cinayet sebepleri aqqında bir şey bildirmedi. «Crocus City Hall» ücümine alâqası olğanını «İslâm devleti» halqara terror teşkilâtı aydınlatqan edi. Umumen dava boyunca 11 insan tutuldı. Qalğanları aqqında bir malümat yoq.
Martnıñ 23-nde Rusiye Tahqiqat komiteti bildirgenine köre, «Ukrayına sıñırından uzaq olmağan Brânsk vilâyetindeki mahsus hızmetler ve uquq qoruyıcı organlar «Crocus City Hall» kontsert salonında terakt yapqan dört şübhelini tuttı.
FSB, terror ücüminde iştirak etken şahıslar «Rusiye-Ukrayına sıñırından» keçecek edi, «Ukrayına tarafında bağları bar edi», dep bildirdi. Bu versiyağa Rusiye prezidenti Vladimir Putin de qoltuttı.
Martnıñ 22-nde aqşam kamuflâjlı urbada bir qaç insan kontsert salonında avtomatlardan ateş açıp, binanı ateşke berdi.
Rusiye Tahqiqat komiteti terakt maddesine istinaden cinnaiy tahqiqat başlattı. Rusiye kütleviy haber vastaları bildirgenine köre, terakttan soñ ücüm etkenler maşinada saqlandı.
«Agentstvo» neşiri qayd etkenine köre, «Crocus City Hallğa» qarşı ücüm – 2004 senesinden berli 300-den çoq insan elâk olğan Beslan mektebindeki ücüm vaqtından Rusiyede eñ büyük terakttır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
