Qazan mahkemesi Azatlıq Radiosınıñ tatar-başqır hızmetiniñ Idel.Aqiqat jurnalisti Alsu Kurmaşevanı dekabrniñ 5-ne qadar tevqifli qaldırdı.
Idel.Aqiqat leyhası haber etkeni kibi, advokat mahkemeden sıñırlama tedbiri azatlıqtan marum etüv ile bağlı olmamasını istegen. Mahkeme oturışı ise haber vastaları içün qapalı şekilde keçirilgen.
Haber etilgeni kibi, Kurmaşeva oktâbrniñ 18-nde Qazanda yaqalandı. Rusiyede o "çetel agent" olaraq qaydiyetten keçmemekte qabaatlana, bu ise beş yıl apis cezasını köz ögünde tuta.
Belli olğanı kibi, Azatlıq Radiosınıñ tatar-başqır hızmetiniñ Pragadan jurnalistiniñ ABD ve Rusiye vatandaşlığı bar. Mayıs ayında Kurmaşeva Rusiyege "acele işinen" keldi.
İyünniñ 2-nde Qazan ava limanından Çehiyağa qaytmaq içün uçaq beklegende onı vaqtınca yaqalağan ediler. O zaman Amerika ve Rusiye pasportlarını tutıp alğanlar ve o Rusiyeden ketip olamağan.
Başta oña Rusiye akimiyet organlarında Amerika pasportnı qayd etmegeni içün para cezası tayin etilgen edi. Oktâbrniñ 18-nde jurnalistke yañı qabaatlav kösterildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
