Şimaliy Kavkaz arbiy mahkemesi oktâbr 2-sinde, Enver Seytosmanovnıñ davasında Aqyar "Hizb ut-Tahrir davası" boyunca mahkemelengen Rustem Vaitov ve Ruslan Zeytullayevni sorğuğa çekti.
Bunı, Qırım.Aqiqatqa tefsir bererek, Seytosmanovnıñ advokatı Sergey Legostov bildirdi.
"Vaitov da, Zeytullayev de, Seytosmanovnıñ bu teşkilâtqa alâqası aqqında bir şey bilmegenlerini mahkemege añlattı. Hususan, buña (Rusiye FSB-siniñ fikrince, daa bir bölük teşkilciniñ olmasına - QA) Zeytullayev pek şaştı ve Seytosmanovğa qarşı davağa siyasiy sebepli taqibar, dedi", - aytıp berdi advokat.
Legostovnıñ aytqanına köre, öz şaatlığında Vaitov, Seytosmanovnı az hatırlağanını ve, olar, belki de, "iş boyunca qonuşa bilgenlerini" ayttı. Zeytullayev, qabaatlanğannı mektepte hatırlağanını qoştı, olarnıñ farqı bir sınıf edi.
"İşte, mına böyle, iç kimseniñ tanılmağan terrorcılar bölüginiñ teşkilâtçısı", - dedi advokat.
Hatırlatayıq ki, sentâbr 5 ve 6-ışnda Rusiye mahkemesi, Enver Seytosmanovnıñ davasında Aqyar "Hizb ut-Tahrir davası" boyunca mahkemelengen Nuri Primov ve Ferat Sayfullayevni sorğuğa çekti.
Avgustnıñ başında Şimaliy Kavkaz arbiy mahkemesinde, iştirakçisi Enver Seytosmanov olğan, Aqyar "Hizb ut-Tahrir davası"nıñ birinci oturışı keçirildi.
İyülniñ başında Rostov-na-Donu mahkemesi, video alâqasınen Seytosmanovnıñ tevqif müddetini dekabrniñ 20-sine qadar uzattı. İyülniñ soñunda ise Enver Seytosmanovnı Aqmescit SİZOsından Rostov-na-Donu şeeriniñ SİZOsına etep ettiler.
Rusiye quvetçileri, ağa-qardaş Ernes ve Enver Seytosmanovlarnı 2018 yılı mayıs 10-unda Aqyarnıñ Balıqlava rayonınıñ Hayto (Tılovoye) köyünde, tintüvlerden soñ tutıp aldılar.
Ernesni soñra yiberdiler, Enverge ise cinaiy dava açılğanı aqqında qarar berildi. Onı, Rusiye CK-niñ 205.5 maddesine (terror teşkilâtınıñ faaliyetini teşkil etüv ya da iştirak etüv) binaen qabaatlaylar.
