Rusiye mahküm etken ukrainalılar Volodımır Baluh ve Roman Suşçenkonı fevralniñ 8-nde doğğan künlerini qayd eteler. Qırımlı ukrain faali Baluh 48 yaşını toldura, jurnalist Suşçenko – 50 yaşını.
Volodımır Baluhnıñ doğğan kününde «Qırım aq qorçalayıcı gruppasınıñ» faalleri Kyivniñ Mustaqillik Meydanında «Baluhqa azatlıq» aktsiyasını keçirecek. Teşkilâtçılarınıñ bildirgenine köre, aktsiyada mahkümlerge mektüp yazmağa fursat olacaq.
Mahküm etilgen jurnalist Roman Suşçenkonı bugün Rusiyeniñ Kirov şeerine kelgen cemaat imayecisi Mark Feygin ziyaret etmege tırışacaq. Suşçenkonıñ işbirligi yapqan «Ukrinform» saytı yazğanına köre, «Roman Suşçenko – jurnalist, ressam, siyasiy mabüsniñ doğğan künü» körüşüvini keçirecek. Mında Suşçenkonıñ resimleri numayış etilecek ve kelgenlerge oña varaqalarnı imzalamağa imkân berilecek.
Kreml kontrolindeki Qırım Yuqarı mahkemesi ukrain faali Volodımır Baluhnıñ imayesine cezası müddetiniñ ğayrıdan baqıluv muracaatını red etti.
Kreml nezaretindeki Qırım Yuqarı mahkemesi Volodımır Baluhnı 4 yıl ve 11 ay umumiy rejim koloniyasında qalmasına ve 10 biñ ruble (tahminen 4 biñ ğrıvnâ) para cezasını ödemesine üküm etti. Faal eki cinaiy iş boyunca tevqif etildi.
2018 senesi martnıñ 19-nda Volodımır Baluh açlıqqa başlağan edi. Bir aydan ziyade bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi. Daa soñra mahküm etilgen ukrain faali açlıqnı vaqtınca toqtatmağa qarar aldı. Advokatlarnıñ malümatına köre, 200 künden çoq açlıq tutqan Baluhnıñ ülser ve pankreatit şübesi peyda oldı.
FSB, Volodımır Baluhnı 2016 senesi dekabrniñ 8-nde tuttı. FSB hadimleri Volodımır Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.
«Memorial» aq qorçalayıcı merkezi Volodımır Baluhnı siyasiy mabüs olaraq tanıdı. Aq qorçalayıcılarnıñ fikirince, faalni taqip etüv sebebi evinde tiklegen «Sema Yüzü Qaramanları soq., 18» levhası olğan.
