Kyivniñ Peçersk rayonında Rusiye raketa ücümi neticesinde mesken ev zarar kördi, bir kişi yaralandı. Bu aqta şeerniñ arbiy memuriyet yolbaşçısı Serğiy Popko haber etti.
«İlk malümatqa köre, Kyivge qarşı raketa ücümi neticesinde parçalar Peçersk rayonında tüşti. Mesken ev zarar kördi», – dep yazdı o, Telegram kanalında.
Popko bildirgenine köre, Peçersk rayonında çoq qatlı yaşalmağan bina zarar kördi, yanğın olmadı. İlk malümatqa köre, bir kişi yaralandı.
Umumen raketa parçaları Kyivniñ dört rayonında tüşti – Peçersk, Ğolosiyıvskıy, Solomenskıy, Dniprovskıy.
Şeer yolbaşçısı Vitaliy Klıçko Peçersk,Solomenskıy, Dniprovskıy rayonların acele hızmetler çağırıldı, dep haber etti.
Patlav sesleri Kyivde ava telükesi ilân etilgen soñ birden oldı. Monitoring kanalları işğal etilgen Qırımdan raketalar uçurıldı, dep yazğan edi.
Rusiye arbiyleri çeşit silâlardan – dron, raketalar, RSZO - Ukrayına regionlarına muntazam surette ücüm ete. Yanvar ayında Rusiye ücümlerini quvetleştirdi, neticede onlarnen insan elâk oldı, yüzlernen insan yaralandı.
Moskva, isbat ve şaatlıqlarğa baqmadan, tam cenk başlağanından berli Ukrayınada vatandaşlarğa ateş açılğanını red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
