Küzniñ üç ayı içinde Rusiye Ukrayinağa altı biñden ziyade uçucısız uçaq ve raketa attı, dep bildire The Wall Street Journal gazeti.
Bu 2023 senesiniñ yazında olğanından üç qat ziyade ve 2023 senesiniñ küzünde olğanından dört qat ziyade. Neticeler Ukrayina Ava quvetleriniñ malümatına esaslana ve ücümler aqqında bildirüvler, şaatlarnıñ ikâyeleri ve ukrayin memurlarınıñ izaatlarına uyğundır, dep qayd ete WSJ.
Ukrayinada çıqarılğan uzaq mesafeli silânıñ 92% pilotsız uçaq ve "tuzaqlar" — ava mudafaası ve mobil ateş gruppalarınıñ diqqatını dağıtmaq içün qullanılğan silâsız dronlar edi. Ukrayina arbiyleri aytqanı kibi, ücüm vaqtında uçaqlarnıñ yarısı "tuzaqlar" ola bile.
Diger uçaqlardan bazıları mesken evlerge ve elektrik energiyası obyektlerine tüşe, çoqusı radioelektron küreş vaqtında yoq etile ya da ğayıp ola. Hususan, ukrayin arbiyleri GPS malümatını deñiştire — uçaq yolundan çıqa, soñra yönelişini tüzetip, maqsadını tekrar urmağa tırışa, amma bu vaqıt ve yaqarlıq masraf ete.
WSJ malümatına köre, ava mudafaa gruppalarına tüşürilgen uçaqlarğa yaqınlaşmağa yasaq etile, çünki bazı uçaqlarnıñ patlavı lâğu etildi. Bundan da ğayrı, uçaqlarnıñ bir noqtağa uçıp, soñra başqa noqtağa uçıp ketkenleri de ola. Arbiylerniñ qayd etkenine köre, uçaq bir yerde zarar körse, diger uçaqları bir ay devamında ondan qaçınmaqta.
Rusiye arbiyleri çeşit silâ çeşitleri ile muntazam sürette ukrayin regionlarına ücüm ete.
Rusiye yolbaşçılığı, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerini yoq etip, maqsatlı darbeler endirgenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
