Ukrayinanıñ bir qaç vilâyetinde dekabrniñ 23-nde saba elektrik energiyası söndürildi – Rusiyeniñ energetik infrastrukturağa qarşı raketa-dron ücümi neticesinde, dep haber ete "Ukrenergo".
"Ğayrıdan tiklev işleri telükesizlik vaziyeti buña imkân bergende başlanacaq. Qazaiy söndirüvler energetik sistemada vaziyet stabilleşken soñ lâğu etilecek", – dep aytıla haberde.
Angi vilâyetler aqqında aytıla – qayd etilmey. DTEK şirketi bildirgenine köre, "Ukrenergo" emrinen Kyiv şeeri, Kyiv ve Dnipropetrovsk vilâyetlerinde elektrik energiyası söndürile. Çerkası vilâyetinde de qazaiy söndirüvler aqqında haber etildi.
Rusiye ordusı gece Ukrayinağa uçucısızlarnen ücüm etti, saba Ava quvetleri Rusiye raketalar da uçurdı, dep bildirdi. Bütün Ukrayinada ava telükesi ilân etildi.
Prezident Volodımır Zelenskıy Rusiye Milât bayramlarında Ukrayinağa qarşı kütleviy darbeler endire bile, dep tenbilegen edi.
2022 senesi fevral ayında büyük istilâ başlağanınen Rusiye Ukrayinanıñ energetik infrastrukturasına darbeler endire. 2025 senesi küz kelgeninen Rusiye ordusı Ukrayina energetikası ve gaz infrastrukturasına qarşı ücümlerni arttırdı.
Ukrayinada Rusiye ateşlerinden energetika obyektleri zarar körgeninden saat-saat elektrikler söndürile ve sanayı qullanıcıları ve biznes içün küç sıñırlav cedvelleri bar.