Rusiye kütleviy haber vastaları aprelniñ 30-nda gece Qırımdaki Rusiye ava mudafaasınıñ işi aqqında bildire. Hususan, Qırımnıñ bir qaç şeerinde patlav sesleri aqqında haber etile.
RF ve Rusiye "arbiyleriniñ" bir sıra telegram kanalları Kezlev, Sarabuz, Canköy, Aqmescit ve Krasnoperekop rayonlarında raketa ücümleri aqqında yazalar. Zaporijjâ vilâyetiniñ rusiyeli işğalci memuriyetiniñ vekili Vladimir Rogov, Ukrayina Silâlı quvetleri ATACMS raketaları ile ücüm etkenini iddia ete.
Rusiye akimiyeti ve Rusiye Mudafaa nazirligi bu malümatnı resmiy şekilde izaatlamadı. Ukrayina tarafı bu haberlerge daa cevap bermedi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
