Rusiye ordusı cuma aqşamı Poltava vilâyetiniñ Kremençug şeerine raketa darbesini endirdi. Vilâyetniñ arbiy memuriyet yolbaşçısı Dmıtro Lunin raketalardan biri vatandaş infrastrukturasınıñ obyektine ücüm etti, dep bildirdi. Bir barışıqsever insan elâk oldı. 15 kişi yaralandı, aralarında bir bala bar.
Kremençugğa qarşı atılğan raketalarnıñ sayısı aydınlatılmay. Lunin bir raketa ava mudafaa vastalarınen urıp tüşürildi, dep bildirdi. Ukrayına Silâlı quvetleriniñ Ava quvetleri Kremençug tarafına qanatlı raketa uçurıldı, dep bildirgen edi.
Rusiye Ukrayınağa er kün ateş aça. Rusiye Mudafaa nazirligi mesken evler ve vatandaş infrastrukturasına ücüm etkenini inkâr ete, tek arbiy nişanlarğa darbe endire, dep bildire.
BM sentâbrniñ 12-nde yapqan esaplarına köre, Ukrayınada büyük cenk başlağanınen 9624 barışıqsever sakin elâk oldı, 17 biñden çoq insan yaralandı. Mında tek qayd etilgen adiseler aqqında aytıla. Qurbanlarnıñ kerçek sayısı daa çoq ola bile. İntensiv uruş areketleri ketken yerlerden ve Rusiye ordusı işğal etken rayonlardan tarafsız malümat almaq imkânsız ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
