Rusiye ordusını Kremençukta ücüm zamanı biñden çoq vatandaşnıñ buluna bilecegi ticaret-eglence merkezine raketa darbesini endirdi. Bunıñ aqqında Ukrayina prezidenti Volodımır Zelenskıy Telegram kanalında haber etti.
"İşğalciler biñden çoq silâsız adamnıñ bulunğanı ticaret merkezine raketa darbelerini endirdi. Ticaret merkezi yana, qurtarıcılar yanğınnı söndürmege tırışalar, qurbanlarnıñ sayısını tasavur etmek mümkün degil. Rusiye ordusı içün telüke yoq. Strategik deger yoq. Adamlarnıñ normal ömür yaşamağa tırışması işğalcilerni böyle açuvlata. Rusiye öz quvetsizligini adiy adamlardan çıqarmağa devam ete. Onıñ tarafından uyğunlıq ve insanlıq olacağına ümüt etmek nafiledir", - dep izaatlıdı bu vaqianı devlet başı.
Poltava vilâyetiniñ arbiy memuriyetiniñ başı Dmıtro Lunin ticaret merkezine raketa darbesiniñ endirilmesine "ruslarnıñ insanlıqqa qarşı daa bir arbiy cinayeti" dedi.
"Bu, barışıqsever ealige qarşı gizlenmegen ve utanmaz terror eylemidir. Rusiye terrorcı devlettir. Şimdi anda qurtarıcılar çalışa. Zarar körgenlerniñ sayısı daa belli degil", - dep yazdı Luniñ Telegram kanalında.
Kremençuk şeer başı Vitaliy Maletskiyniñ haber etkenine köre, ücüm neticesinde elâk olğanlar bar, amma olarnıñ sayısı şimdilik belli degil.
Rusiye arbiyleri kremunçuktaki ticaret merkezine ücümni daa izaatlamadılar.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
