Link açıqlığı

Saatnıñ esas haberi

Rusiye közeticisi Servet Gaziyevge Tahqiqat komitetine muracaat etmege tevsiye etti – faaller


Servet Gaziyev
Servet Gaziyev

Rusiyeniñ Rostov vilâyeti boyunca cemaat közetüv komissiyası başınıñ muavini Natalya Merkulova Rostov-na-Donudaki 5-nci SİZO-da "Hizb ut-Tahrir davası"nıñ mabüsi 63 yaşındaki Servet Gaziyevni yoqlağanını bildirdi. Sağlıq alını "yaramay" kibi qıymetlendirdi ve köteklev ile bağlı vaziyet aqqında Tahqiqat komitetine muracaat etmege tevsiye etti.

Bunı Qırım.Aqiqatqa "Qırım birdemligi" cemaat birleşmesi haber etti.

Servet Gaziyevniñ tatası Svetlana Ablâmitova faallerge bildirgenine köre, o SİZO-da ağasınen laf etken ve olar ilerideki adımlarnı muzakere etkenler.

"Vaziyetni er taraflama yahşı etip baqacaqmız, çünki vaziyetni ögrenmek kerek. Men bunıñ aqqında ariza yazarım, konsul ile telefonlaşırım. Belki de beraberlikte bir şey yaparmız" dedi Merkulova.

Közetici ekspertizalar ve Tahqiqat komitetine ariza yazacaq advokatnı tapmağa tevsiye etti.

«Hizb ut-Tahrir davası» mabüsi Servet Gaziyevniñ advokatı Edem SemedlâyevTahqiqat komitetine ve Rostov vilâyetiniñ prokuraturasına (Rusiye) şikâyet ve cismaniy ve maneviy iskence faktına köre SİZO-ğa ariza yolladı.

Advokat Lilâ Gemeciniñ haber etkenine köre, Rostov-na-Donudaki 19-ncı vilâyetlerara verem hastahanesinde 61 yaşındaki qırımtatar sisâsiy mabüsi Servet Gaziyev cısmaniy zorbalıqqa oğratılğan.

Rusiyeniñ Rostov-na-Donu tahqiqat izolâtorında mikroinsult keçirgen Aqmescitteki ekinci «Hizb ut-Tahrir davasınıñ» mabüsi 61 yaşında Servet Gaziyevniñ alı eyileşmedi.

Rostov vilâyeti Rusiye İnsan aqları vekâletlisiniñ apparat reberi Vladimir NekrasovAqmescitteki ekinci «Hizb ut-Tahrir davasınıñ» mabüsi Servet Gaziyevniñ sağlıq vaziyeti fenalaşqanı içün tibbiy teşkerüv keçirmek talabınen muracaat yolladı. Ukraina ombudsmanı Lüdmila Denisova Rusiye insan aqları vekâletlisi Tatyana Moskalkovağa muracaat etip, Gaziyevniñ aqlarını ğayrıdan tiklemege, oña kerekli tibbiy yardım köstermege ve sağlıq vaziyeti sebebinden sıñırlav tedbirini deñiştirmege talap etti.

2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.

«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.

Qırımdaki «Hizb ut-Tahrir davaları»

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG