Ukrayına mahkemesine Rusiye kontrolindeki Qırım ve Aqyar musulmanları diniy idaresiniñ yolbaşçısı Emirali Ablayevge qarşı qabaatlav qararı yollandı, dep haber ete Qırım Muhtar Cumhuriyetiniñ prokuraturası.
Müessise haber etkenine köre, onı Ukrayına Ceza kodeksiniñ 436-2 maddesiniñ 3-ünci qısmı (Rusiye Federatsiyasınıñ Ukrayınağa qarşı silâlı istilâsını aqlav, doğru tanuv ve inkâr etüv) ve 111-1 maddesiniñ 6-ncı qısmına (kollaborant faaliyeti) istinaden qabaatlaylar.
«Qırım musulmanlarınıñ lafta müftisi bir sıra propagandist kütleviy haber vastasında çıqışta bulunıp, işğalni aqladı, «rus dünyasınıñ ğayelerini» aydınlattı ve Rusiyeniñ Ukrayınağa qarşı silâlı istilâsınen bağlı müsbet şeyler ayttı. Bundan ğayrı, qabaatlanğan kişi milletlerara munasebetlerniñ balansı içün rus tili ve medeniyetine sayğı köstermege çağırdı. Diger taraftan, Ukrayınanıñ yarımada işğaline qarşı çıqqan, 2014 senesinden soñ Qırımnı mecburen terk etken ve esas Ukrayınağa köçken qırımtatar halqınıñ vekillerini takbih etti», – dep bildirdi müessise.
Emirali Ablayev qabaatlavnen bağlı açıq bir izaat bermedi.
Hatırlatamız, Qırım Muhtar Cumhuriyetiniñ prokuraturası fevralniñ 17-nde Emirali Ablayevge kollaboratsion faaliyetinden şübheli sayıla, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
