Rusiyede «Hizb ut-Tahrir davası» boyunca mahküm etilgen qırımlı Ruslan Zeytullayevni Salavat koloniyasında (Başkortostan) ömür arqadaşı ziyaret etti. Bu aqta «Qırım birdemligi» cemaat birleşmesi haber ete.
«Aprelniñ 26-ndan 29-na qadar aqayımnı ziyaret etken edim. Lagerde olacağı qadar er şey yahşı. Aprelniñ 24-nde onı konsul ziyaret etti. Kerekli ilâclarnı berdi. Er keske selâm ayttı. Siziñ yardımıñız ve yapqan işiñiz içün teşekkürler bildire. Er kesni mubarek Ramazan ayınen tebrikley. Qasevetlengen ve sevgen halqına mektüp yaza», – dep bildirdi Meryem Zeytullayeva.
Onıñ aytqanına köre, o, anda olğan edebiyatnı çoq oquy.
Ruslan Zeytullayev Rusiye mahkemesi tarafından «Hizb ut-Tahrir» teşkilâtınıñ bölügini qurğanında qabaatlanğan edi.
2017 senesi iyül ayında Rusiye Yuqarı mahkemesi Zeytullayevniñ apis cezasını 15 yılğa qadar arttırdı. Buña cevap olaraq aqyarlı açlıq ilân etken edi.
Ukraina Tış işler nazirligi Rusiye Yuqarı mahkemesiniñ apis cezasını arttırmaq qararına qarşı narazılıq bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
