Advokat Sergey Legostov Bağçasaraydaki birinci «Hizb ut-Tahrir davasınıñ» mabüsleri Remzi Memetov ve Zevri Abseitovnı Rusiyeniñ Stavropol koloniyasında ziyaret etti. Onıñ malümatına köre, ekisiniñ de «sağlıq vaziyeti bayağı fenalaştı», Abseitovnıñ yañı hastalıqları bar.
Bu aqta advokat «Qırım birdemligi» cemaat birleşmesine ayttı.
Legostovnıñ bildirgenine köre, Zevri Abseitov koloniyada tibbiy yardım almağa istemey.
«Eski diagnozları bar, amma yañı hastalıqlar da peyda oldı, 5 yıldan berli apiste yata. Onıñ fikirince, tek mustaqil ekimler, tibbiy donatma, imayeci ve Ukraina konsulı yardımınen ile tedaviylenmesi mümkün. Tek bu formatta tedaviylenmesini köre, başqa ekimlerge işanmay, özü tiş ekimi ola. Koloniyada kerekli tibbiy yardım almaq imkânsızdır», – dep ayta advokat.
Onıñ malümatına köre, Memetovnıñ sağlıq vaziyeti de yaramay, oña ilâc ketirmege rica etti.
Advokatnıñ aytqanlarını diger menbalar şimdilik isbatlamadı, Rusiye Cezalarnı yerine ketirüv federal hızmeti qırımlılarnıñ sağlıq vaziyetinen bağlı malümat bermey.
2016 senesi mayısnıñ 12-nde Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede Bağçasaraynıñ dört sakini: Zevri Abseitov, Remzi Memetov, Rustem Abiltarov ve Enver Mamutov tutulıp, terrorizmde qabaatlandı. Olar, Rusiyede terroristik dep tanılğan «Hizb ut-Tahrir» teşkilâtında iştirak etkenlerinde şübeli dep sayıla.
2018 senesi dekabr ayında Şimaliy-Kavkaz okrugınıñ arbiy mahkemesi Enver Mamutovnı 17 yıl sert rejimli koloniyada qalmasına üküm etti, Ruslan Abiltarov, Remzi Memetov ve Zevri Abseitov 9 yıl sert rejimli koloniyada qalmasına üküm etildi.
Mabüslerden iç birisi qabaatını tanımadı. Olar cinaiy işniñ «siyasiy sebepleri bar», dep qayd etti.
İyülniñ 11-nde Rusiye Yuqarı mahkemesi dava mabüsleriniñ ükmüni deñiştirdi. Enver Mamutovğa 16 yıl ve 9 ay apis cezası berildi, Remzi Memetov, Rustem Abiltarov, Zevri Abseitovğa – 8 yıl ve 9 ay.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
