Rusiye tarafından koloniyalarda tutulğan qırımlılar arasında doquz kişiniñ saqatlığı bar, dep bildire Qırımtatar resurs merkezi.
Aq qorçalayıcılar qayd etkenine köre, tahqiqat izolâtorları ve apishanelerde uyğun olmağan tutuv şaraitleri, şikâyetlerniñ körmemezlikke uruluvı ve tibbiy yardım kösterilmegeni sebebinden sağlıq vaziyetleri beterleşe.
«Ne yazıq ki, acınıqlı aqibetleri bar, 2-nci derece saqatı, 60 yaşında siyasiy mabüs Cemil Gafarov, sağlıq problemleri olğan 61 yaşında Konstantin Şirin ve 60 yaşında Rustem Virati vefat etkenler», – dep qayd etti Qırımtatar resurs merkezi.
Qırımtatar resurs merkeziniñ malümatına köre, al-azırda apishane ve koloniyada bulunğanlar:
- Zekirya Muratov – 3-ünci derece saqatı.
- Aleksandr Sizikov – 1-inci derece saqatı.
- Timur İbragimov – 3-ünci derece saqatı.
- Servet Gaziyev – 2-nci derece saqatı.
- Amet Suleymanov – 3-ünci derece saqatı.
- Timur Yalkabov – 3-ünci derece saqatı.
- Rustem Seytmemetov – 3-ünci derece saqatı.
- Nikolay Petrovskiy – 3-ünci derece saqatı.
- Remzi Kurtnezirov, 2-nci derece saqatı, şimdi ev apsinde buluna.
«İşğal etilgen Qırımda eñ yüksek beden ve maneviy sağlıq aqqı bozuluvlarınıñ sayısı artqanı körüne. Qırımtatar resurs merkeziniñ malümatına köre, 2024 senesi eñ az 64 beden ve maneviy sağlıq aqqı bozulğanı qayd etildi, 56-sı qırımtatarlarğa qarşı. 2023 senesi 52 (43), 2022 senesi ise 36 (32) qayd etildi», – dep qayd etti Qırımtatar resurs merkezi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
