Rusiyeniñ Blagoveşçensk şeerindeki kollecde açılğan ateş neticesinde beş kişi yaralandı. Amursk vilâyetiniñ Sağlıq nazirligi vekiliniñ terrorizm ile küreş komissiyasınıñ keniş toplaşuvında qayd etkenine köre, üç kişi hastahanege alındı, daa ekisi qaza yerinde yardım aldı, dep bildirdi TASS agentligi.
«Qaza yerinde acele yardımğa daa eki vatandaş muracaat etti. Bu reaktiv alı (psihik yaradan soñ psihik al – QA) olğan qadın oca ve köküs qafesi zarar körgen genç adam. Olarğa yardım kösterildi», – dep ayttı Sağlıq nazirliginiñ temsilcisi.
Qayd etile ki, Rusiye Tahqiqat komiteti endi üç dava açtı: kollecdeki atış, kerekli qaravulnıñ teminlenmemesi ve emallıqnen bağlı.
Cumaaqşamı künü, noyabrniñ 14-nde, 19 yaşında genç adam Blagoveşçensk şeeriniñ Amursk kollecinde ateş açtı. Odada tahminen 20 kişi bar edi.
Şaatlarnıñ aytqanına köre, ders vaqtında student kenefke çıqıp, tüfeknen qayttı. Regional İç işler nazirligi oğlan elâk oldı, dep bildirdi.
Böyle bir facia Rusiye işğal etken Qırımda da olğan edi. 2018 senesi oktâbrniñ 17-nde Keriç politehnik kollecinde atış ve patlavlar oldı. Rusiye Tahqiqat komitetiniñ malümatına köre, patlavnı 4-ünci kurs studenti, 18 yaşında Vladislav Roslâkovkerçekleştirdi. O, «özüni öldürdi». Şeerniñ Rusiye akimiyeti facia neticesinde 21 insan elâk oldı, dep bildirdi.
