Rusiye Federatsiyası Keriç parom keçitini 100% qorçalap olamay, amma Rusiye arbiyleri onı qullanmağa devam ete, dep bildirdi Ukrayina Arbiy-deñiz quvetleriniñ spikeri Dmıtro Pletençuk.
"Tamir etildi, esasen qullanıla. Mesele — ne qadarğa yetecegidir, amma buña baqmadan, olarnıñ başqa çareleri yoq. Bu, olarnıñ taqımını temin etmek içün esas logistika yoludır. O, ücüm etilgenine qadar da böyle edi. Ğalebe tesadüfiy degil edi, bu parom keçitiniñ logistika miqdarını köz ögüne alsaq, bu ise dörtte üçten ziyade, yani qanuniy arbiy nişan. Çünki Qırım ve Ukrayinanıñ cenübinde taqımnı temin etken o ola", — dep bildirdi Pletçençuk.
O şunı da qayd etti ki, Rusiye arbiyleri keçitniñ qoruvını quvetleştirmege tırışa, amma Keriç boğazını bütünley qapatıp olamaylar.
"Olar anda belli tedbirler keçire, daa bir şey qurmağa tırışalar, nevbetteki çit qurmağa tırışalar, amma kene de Keriç boğazını bütünley qapatmağa imkânları yoq, anda vatandaş gemileri qatnay, anda çetel bayraqları altında gemiler kele", — dep qayd etti spiker.
Daa evel Pletençuk, Rusiye mayısnıñ 30-na keçken gecesi raketa darbesine oğrağan Keriç parom keçitiniñ işini yañıdan başladı, dep bildirgen edi. O vaqıt Qırım.Aqiqat mühbiri yarımadanıñ şarqında silâ sesleri eşitilgenini bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
