Ukraina delegatsiyası OSCE-niñ Telükesizlik işbirlik forumında Rusiyeni Keriç boğazında gemiler qatnavı serbestligini yañıdan tiklemege ve Qırımdan ketmege çağırdı. Bu aqta delegatsiyanıñ Ukraina TİN saytında yayınlanğan beyanatında yazıla.
“Biz Rusiye Federatsiyasını Ukrainağa qarşı tecavuznı toqtatmağa, Qırımnıñ qanunsız işğalinden vazgeçmege, Donbas bölgelerini işğalden azat etmege ve Qara deñizde Keriç boğazı ve Azaq deñizinden gemiler qatnavı serbestligini yañıdan tiklemege çağıramız. Rusiye Minsk añlaşmalarında qayd etilgen bütün mecburiyetlerini yerine ketirmeli, olarnıñ arasında Ukrainanıñ vaqtınca işğal etilgen topraqlarından quvetlerini, qanunsız silâlı müfrezelerini ve silâsını keri çeküv”, - yazıla bildirmede.
Rusiye delegatsiyası Ukrainanıñ beyanatını tefsir etmedi.
Soñki vaqıtları Qara deñiz, Azaq deñizi ve Keriç boğazı kibi vatandaş gemileri ve Ukraina arbiy deñizcileriniñ areketleri içün telüke olğan Rusiye arbiy-deñiz flotu ve diger deñiz birleşmeleriniñ faal areket yerleri oldı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
