İyülniñ 19-na keçer gecesi Rusiye Ukrayınağa raketa ve dronlarnen ücüm etti – Odesada patlavlar aqqında haber etildi, Kyivde ava mudafaa sisteması çalıştı.
Jitomir vilâyetiniñ akimiyeti uçucısız infrastruktura obyektine ve bir qaç mustaqil evge zarar ketirdi, dep bildirdi. Dnipropetrovsk vilâyetiniñ memuriyeti tüşürilgen dron aqqında bildirip, yaralanğanlar ve yıqılğan binalar yoq, dep qayd etti.
Odesada ücüm neticesinde bir qaç bina zarar kördi.
Kyivge ketken bütün uçucısızlar tüşürildi, dep bildirdi şeerniñ arbiy memuriyeti.
Ukrayına Silâlı quvetleriniñ Baş ştabı bildirgenine köre, iyülniñ 19-na keçer gecesi Rusiye Federatsiyası Ukrayınağa qarşı 6 «Kalibr» qanatlı raketasını ve 35 dronnı qullandı. Bütün raketa ve dronlar yoq etildi, dep haber etile.
Rusiye prezidenti Vladimir Putin Keriç köprüne qarşı ücümni «terakt» dep adlandırdı ve Rusiye cevap berecek, dep vade etti. Rusiye Mudafaa nazirligi «teklif azırlay», dep qoştı.
İyülniñ 18-ne keçer gecesi Rusiye ordusı Odesa ve Mıkolayıvge altı «Kalibr» raketasını ve 20-den ziyade Shahed-136 İran dronını qullanıp, Ukrayına cenübine ücüm etti. Ava mudafaa sisteması bütün raketalarnı tüşürdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
