Rusiye ordusı martnıñ 29-nda gece Ukrayınağa raketa ve uçucısızlarnen ücüm etti. Darbe neticesinde Ukrayınanıñ ğarbi ve merkezinde elektrik stantsiyaları zarar kördi, dep haber ete «Ukrenergo».
Dnipropetrovsk vilâyetinde elektrikler kesildi, Harkivde saat-saat kesile. Diger tafsilâtlar yoq.
Dnipropetrovsk vilâyetiniñ arbiy memuriyet yolbaşçısı Serğiy Lısak bildirgenine köre, kritik infrastruktura obyektleri ücümge oğradı. Kamenskiy rayonında bir qaç ev yıqıldı ve zarar kördi. Beş kişi yaralandı, aralarında beş yaşında qızçıq da bar. Yaralanğanlardan biri – ağır alda.
Ukrayına energetika naziri German Galuşçenko bildirgenine köre, memleketniñ energetik sistemasına daa bir büyük darbe yapıldı, bu sefer Dnipropetrovsk, Poltava ve Çerkası vilâyetlerindeki obyektlerge ücüm etildi. Darbe nişanı elektrik energiyasınıñ generatsiya obyektleri de oldı, dep yazdı o.
Hmelnitsk, Lviv ve İvano-Frankivsk vilâyetlerinde patlavlar aqqında da haber etildi.
Poloniya Silâlı quvetleriniñ komandanlığı bildirgenine köre, gece Rusiyeniñ Ukrayınağa qarşı raketa ücümi sebebinden arbiy aviatsiya köterildi.
Rusiye arbiyleri ücüm haberlerini daa izaatlamadı.
Ukrayına Mudafaa naziri Rustem Umerov cumaaqşamı künü NATO-Ukrayına Şurasınıñ nevbetten tış toplaşuvında Rusiye Ukrayınağa qarşı darbeleriniñ 97 fayızı vatandaş infrastrukturasına yapıla, 2024 senesiniñ başından olarnıñ küçü doquz kilotonnadan çoq oldı.
«Bu Rusiye raketaları, uçucısızları ve idare etilgen bombalarnıñ tek üç fayızı arbiy nişanlarğa yetti», – dep yazdı Umerov Facebook saifesinde.
Ukrayına Mudafaa naziri BM insan aqları Yuqarı komissarı idaresiniñ malümatını da ayttı, «soñki üç ayda BM qayd etken 1804 vatandaşından 712-si raketa ücümlerinden elâk oldı».
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
